Aste honetan Eurocampus kultur elkartea aurkezten dizuegu, 1995. urtean europar gaietan aditu ziren zenbait ikasle eta profesional gaztek sortu zuten irabazi asmorik gabeko erakundea. Erakundea unibertsitate komunitateak bereziki eta, orohar, gure gizarteak Europar Batasunaren inguruan zuen ezagupen maila eskasa eta informazio hutsuneak zirela eta sortu zen.
Erakundearen xede nagusiak europar integrazio prozesua azaltzea eta hiritarrei eta, bereziki, unibertsitate komunitateari, europar errealitatea eta Europar Batasunak eskaintzen dituen aukerak, gehienbat, hezkuntza, trebakuntza, zientzia, ikerketa eta enplegu esparruetan, gerturatzea dira.


Gure erakundearen bestelako xedeak lirateke:

• Giza eskubideak, baloreetan oinarritutako hezkuntza, bakearen kultura eta oinarri demokratikoak sustatzea;
• europar aniztasun kulturala sustatzea;
• euskal kulturaren ezagutza atzerrian sustatu eta bultzatzea, batez ere Europan, euskararen hedapenari, Euskal Autonomia Erkidegoaren barrukaldean zein kanpoaldean, arreta berezia eskainiz;
• europar erakundeek hiritarrei eta, bereziki, gazteei, ematen dizkieten aukerak hedatzea;
• pertsona, kultura eta herrien arteko elkartasun eta elkarlanaren alde lan egitea;
• ezagutzaren Europa lortzera bideratzen diren ekimenak lagundu eta sustatzea eta, azkenik, Euskal hiritaren artean, eta bereziki gazteriaren artean, kultura zientifikoa jendarteratzea.

Eurocampus Kultur Elkarteak, 1995an sortu zenez geroztik, europar integrazioaren garapenaren aldeko jarduera zabala izan du. 1995. urteko urritik Eurocampus aldizkaria argitaratzen dute, europar informazioari buruzko argitalpen aintzindaria Euskadin. Era berean, hiruhilero argitaratzen den ±18 Presta Ezazu Zure Etorkizuna aldizkarian ere parte hartzen du. Hau, 16 eta 19 urte bitarteko gazteei bideratutako aldizkaria da eta hezkuntza gaiak jorratzen ditu.
Eurocampusek garatu izan duen beste ekintza bat 1998an garatu zen eta PRINCE informazio eta hedapen erkidego-programari atxikituta zegoen ‘Tú eres Europa’ ekimena izan zen. Aipatu programan 9 de Mayo Kultur Elkarteak eta Donostiako Centro de Estudios Europeos-ek ere parte hartu zuten.
Gure erakundeak 2007an Erromako Itunaren 50. urteurrena jendarteratzeko Europar Parlamentuak diruz lagundu zuen Iacobus ekimenaren antolakuntzan ere parte hartu du.
Era berean, 2013. urtean zehar, Euskal Autonomia Erkidegoan garatu den Europame ekimenean hartu du parte. Hau, Europar Parlamentuak diruz lagundu duen ekimena da eta aurten izango diren europar hauteskundeetan partehartzea sustatzea eta europar hiritar aktiboak sustatzea izan du helburu nagusia.
1997. urtetik Eurocampus Kultur Elkartea Nazioarteko Europar Mugimenduaren sortzaileetako bat den Eurobaskeko (Europako Mugimenduaren Euskal Kontseilua) eta Giza Eskubide eta Bake Hezkuntzaren Elkarteen Foroko kidea da.