UNESCO ETXEA. EUSKAL HERRIKO UNESCO ZENTROA

11/11/2013

Aste honetan UNESCO Etxea – Euskal Herriko UNESCO Zentroa aurkezten dizuegu, irabazi-asmorik gabeko erakundea (GKE) . 1991ean sortu zen eta UNESCO (Hezkuntza, Zientzia eta Kulturarako Nazio Batuen Erakundea) erakundearen printzipioak, programak eta jarduera-ildoak euskal esparruan zabaltzeko asmoa du.
2006an Onura Publikokoa deklaratua, egun, elkarteak 135 bazkide ditu, eta horiek osatzen dute erakundearen gizarte-oinarria.

Misioa

Bat egiten dute UNESCOren sorrerako helburuarekin: hau da, bake justu eta duina eraikitzea, pertsona, haren duintasuna eta balioa abiapuntutzat hartuta; horretarako, hain zuzen, nazioarteko bokazioa duen elkartasuneko euskal elkartea sortu zuten, UNESCOren sozietate zibil gisa, eta:

tokiko eta nazioarteko ekimen eta sareetan aktiboki hartzen dute parte;
euskal gizartearen eta nazioarteko komunitatearen arteko elkarreragin eraldatzailea sustatzen dute, batez ere UNESCOrekin eta NBErekin; eta
iritzi eta irizpide propioak ematen dituzte, ikerketaren, eraginaren, prestakuntzaren, berrikuntzaren eta dibulgazioaren bitartez.

Ikuspegia

Bakearen Kulturaren eta eskubideak eta erantzukizunak dituen Giza Garapen Iraunkorraren alde egiten dute lan. Pertsonak, gizarte-erakundeak, hizkuntza- eta kultura-komunitateak eta herriak kontuan hartuko dituen mundu baten alde lan egiten dute, denon artean hiritartasun demokratiko globala eraikitzeko. Pertsona-talde sortzaile, parte-hartzaile, parekide eta aktiboa osatzen dute, Eginkizunarekin eta Balioekin identifikatzen dena.

Balioak

Balio hauekin identifikatzen dira:

Zintzotasuna; izan ere, bere zereginak, legezkoa eta etikoa izateaz gain, bere sektoreko jokabide-kode onena bete behar du.
Partaidetza asertiboa, talde profesionalaren, Zuzendaritza Kontseiluaren, bazkideen eta kolaboratzaileen aldetik;
Zuzentasuna, eskubide eta betebeharrei dagokienez;
Gardentasuna eta gidaritza egokia, barrura nahiz kanpora begira, jarduerak, zuzendaritza-organoetako kideen izenak eta haiek hautatzeko eta berritzeko modua, ikuskatutako kontuak eta kudeatutako fondoen jatorria urtero argitaratuz.
Profesionaltasuna, arlo guztietan kalitatez, eraginkortasunez, zehaztasunez eta errespetuz lan eginez;
Sarean lan egitea, gure konpromisoak tokiko eta nazioarteko sare eta aliantzekin partekatuz;
ndependentzia, erakunde publiko eta pribatuekin elkarlanean arituz, baina, betiere, independentziari eutsiz, eta beti gure ideien printzipio eta balioen arabera jokatuz;
Pluraltasuna, elkartearen barruan zein gure proiekzio publikoan, gure organo eta lanetan gizarte honen konplexutasuna eta osatzen dugun dibertsitate globala kontuan hartuz.